2026-yil 6–9-iyul kunlari Rossiya Federatsiyasining Yekaterinburg shahrida o‘tayotgan “INNOPROM–2026” xalqaro sanoat ko‘rgazmasida “Made in Uzbekistan” milliy stendi o‘z faoliyatini boshladi. Ekspozitsiya mamlakatimiz sanoat salohiyati, innovatsion ishlanmalari va eksportbop mahsulotlarini xalqaro hamjamiyatga namoyish etmoqda.
Milliy stendda turli tarmoqlardagi korxonalar bilan bir qatorda farmatsevtika sohasining 5 ta yetakchi kompaniyasi ham ishtirok etib, zamonaviy dori vositalari, innovatsion texnologiyalar va ilmiy ishlanmalarini taqdim etmoqda.
Ko‘rgazma doirasida Tatariston Respublikasi Raisi Rustam Minnixanov farmatsevtika stendi bilan tanishdi. Unga O‘zbekiston farmatsevtika tarmog‘ida so‘nggi yillarda amalga oshirilgan islohotlar, zamonaviy ishlab chiqarish quvvatlari hamda eksport salohiyati haqida ma’lumot berildi. Shuningdek, tomonlar farmatsevtika sohasidagi hamkorlikni kengaytirish va yangi qo‘shma loyihalarni amalga oshirish istiqbollarini muhokama qildilar.
Ko‘rgazma doirasida yangi hamkorlik aloqalarini yo‘lga qo‘yish, eksport shartnomalarini imzolash hamda mahalliy farmatsevtika mahsulotlarining xalqaro bozordagi raqobatbardoshligini yanada oshirishga qaratilgan qator uchrashuvlar o‘tkazilishi rejalashtirilgan.
